¹ בְּנֵ֖י לֵוִ֑י גֵּרְשֹׁ֕ם קְהָ֖ת וּמְרָרִֽי׃ ² וְאֵ֛לֶּה שְׁמ֥וֹת בְּֽנֵי גֵרְשׁ֖וֹם לִבְנִ֥י וְשִׁמְעִֽי׃ ³ וּבְנֵ֖י קְהָ֑ת עַמְרָ֣ם וְיִצְהָ֔ר וְחֶבְר֖וֹן וְעֻזִּיאֵֽל׃ ⁴ בְּנֵ֥י מְרָרִ֖י מַחְלִ֣י וּמֻשִׁ֑י וְאֵ֛לֶּה מִשְׁפְּח֥וֹת הַלֵּוִ֖י לַאֲבוֹתֵיהֶֽם׃ ⁵ לְֽגֵרְשׁ֑וֹם לִבְנִ֥י בְנ֛וֹ יַ֥חַת בְּנ֖וֹ זִמָּ֥ה בְנֽוֹ׃ ⁶ יוֹאָ֤ח בְּנוֹ֙ עִדּ֣וֹ בְנ֔וֹ זֶ֥רַח בְּנ֖וֹ יְאָתְרַ֥י בְּנֽוֹ׃ ⁷ בְּנֵ֖י קְהָ֑ת עַמִּינָדָ֣ב בְּנ֔וֹ קֹ֥רַח בְּנ֖וֹ אַסִּ֥יר בְּנֽוֹ׃ ⁸ אֶלְקָנָ֥ה בְנ֛וֹ וְאֶבְיָסָ֥ף בְּנ֖וֹ וְאַסִּ֥יר בְּנֽוֹ׃ ⁹ תַּ֤חַת בְּנוֹ֙ אוּרִיאֵ֣ל בְּנ֔וֹ עֻזִּיָּ֥ה בְנ֖וֹ וְשָׁא֥וּל בְּנֽוֹ׃ ¹⁰ וּבְנֵי֙ אֶלְקָנָ֔ה עֲמָשַׂ֖י וַאֲחִימֽוֹת׃ ¹¹ אֶלְקָנָ֑ה בנו אֶלְקָנָ֔ה צוֹפַ֥י בְּנ֖וֹ וְנַ֥חַת בְּנֽוֹ׃ ¹² אֱלִיאָ֥ב בְּנ֛וֹ יְרֹחָ֥ם בְּנ֖וֹ אֶלְקָנָ֥ה בְנֽוֹ׃ ¹³ וּבְנֵ֧י שְׁמוּאֵ֛ל הַבְּכֹ֥ר וַשְׁנִ֖י וַאֲבִיָּֽה׃    ¹⁴ בְּנֵ֥י מְרָרִ֖י מַחְלִ֑י לִבְנִ֥י בְנ֛וֹ שִׁמְעִ֥י בְנ֖וֹ עֻזָּ֥ה בְנֽוֹ׃ ¹⁵ שִׁמְעָ֥א בְנ֛וֹ חַגִּיָּ֥ה בְנ֖וֹ עֲשָׂיָ֥ה בְנֽוֹ׃

¹⁶ וְאֵ֗לֶּה אֲשֶׁ֨ר הֶעֱמִ֥יד דָּוִ֛יד עַל יְדֵי שִׁ֖יר בֵּ֣ית יְהוָ֑ה מִמְּנ֖וֹחַ הָאָרֽוֹן׃ ¹⁷ וַיִּהְי֨וּ מְשָׁרְתִ֜ים לִפְנֵ֨י מִשְׁכַּ֤ן אֹֽהֶל מוֹעֵד֙ בַּשִּׁ֔יר עַד בְּנ֧וֹת שְׁלֹמֹ֛ה אֶת בֵּ֥ית יְהוָ֖ה בִּירוּשָׁלִָ֑ם וַיַּעַמְד֥וּ כְמִשְׁפָּטָ֖ם עַל עֲבוֹדָתָֽם׃ ¹⁸ וְאֵ֥לֶּה הָעֹמְדִ֖ים וּבְנֵיהֶ֑ם מִבְּנֵי֙ הַקְּהָתִ֔י הֵימָן֙ הַמְשׁוֹרֵ֔ר בֶּן יוֹאֵ֖ל בֶּן שְׁמוּאֵֽל׃ ¹⁹ בֶּן אֶלְקָנָה֙ בֶּן יְרֹחָ֔ם בֶּן אֱלִיאֵ֖ל בֶּן תּֽוֹחַ׃ ²⁰ בֶּן ציף בֶּן אֶלְקָנָ֔ה בֶּן מַ֖חַת בֶּן עֲמָשָֽׂי׃ ²¹ בֶּן אֶלְקָנָה֙ בֶּן יוֹאֵ֔ל בֶּן עֲזַרְיָ֖ה בֶּן צְפַנְיָֽה׃ ²² בֶּן תַּ֙חַת֙ בֶּן אַסִּ֔יר בֶּן אֶבְיָסָ֖ף בֶּן קֹֽרַח׃ ²³ בֶּן יִצְהָ֣ר בֶּן קְהָ֔ת בֶּן לֵוִ֖י בֶּן יִשְׂרָאֵֽל׃ ²⁴ וְאָחִ֣יו אָסָ֔ף הָעֹמֵ֖ד עַל יְמִינ֑וֹ אָסָ֥ף בֶּן בֶּרֶכְיָ֖הוּ בֶּן שִׁמְעָֽא׃ ²⁵ בֶּן מִיכָאֵ֥ל בֶּן בַּעֲשֵׂיָ֖ה בֶּן מַלְכִּיָּֽה׃ ²⁶ בֶּן אֶתְנִ֥י בֶן זֶ֖רַח בֶּן עֲדָיָֽה׃ ²⁷ בֶּן אֵיתָ֥ן בֶּן זִמָּ֖ה בֶּן שִׁמְעִֽי׃ ²⁸ בֶּן יַ֥חַת בֶּן גֵּרְשֹׁ֖ם בֶּן לֵוִֽי׃    ²⁹ וּבְנֵ֧י מְרָרִ֛י אֲחֵיהֶ֖ם עַֽל הַשְּׂמֹ֑אול אֵיתָן֙ בֶּן קִישִׁ֔י בֶּן עַבְדִּ֖י בֶּן מַלּֽוּךְ׃ ³⁰ בֶּן חֲשַׁבְיָ֥ה בֶן אֲמַצְיָ֖ה בֶּן חִלְקִיָּֽה׃ ³¹ בֶּן אַמְצִ֥י בֶן בָּנִ֖י בֶּן שָֽׁמֶר׃ ³² בֶּן מַחְלִי֙ בֶּן מוּשִׁ֔י בֶּן מְרָרִ֖י בֶּן לֵוִֽי׃    ³³ וַאֲחֵיהֶ֖ם הַלְוִיִּ֑ם נְתוּנִ֕ים לְכָ֨ל עֲבוֹדַ֔ת מִשְׁכַּ֖ן בֵּ֥ית הָאֱלֹהִֽים׃ ³⁴ וְֽאַהֲרֹ֨ן וּבָנָ֜יו מַקְטִירִ֨ים עַל מִזְבַּ֤ח הָֽעוֹלָה֙ וְעַל מִזְבַּ֣ח הַקְּטֹ֔רֶת לְכֹ֕ל מְלֶ֖אכֶת קֹ֣דֶשׁ הַקֳּדָשִׁ֑ים וּלְכַפֵּר֙ עַל יִשְׂרָאֵ֔ל כְּכֹל֙ אֲשֶׁ֣ר צִוָּ֔ה מֹשֶׁ֖ה עֶ֥בֶד הָאֱלֹהִֽים׃

³⁵ וְאֵ֖לֶּה בְּנֵ֣י אַהֲרֹ֑ן אֶלְעָזָ֥ר בְּנ֛וֹ פִּֽינְחָ֥ס בְּנ֖וֹ אֲבִישׁ֥וּעַ בְּנֽוֹ׃ ³⁶ בֻּקִּ֥י בְנ֛וֹ עֻזִּ֥י בְנ֖וֹ זְרַֽחְיָ֥ה בְנֽוֹ׃ ³⁷ מְרָי֥וֹת בְּנ֛וֹ אֲמַרְיָ֥ה בְנ֖וֹ אֲחִיט֥וּב בְּנֽוֹ׃ ³⁸ צָד֥וֹק בְּנ֖וֹ אֲחִימַ֥עַץ בְּנֽוֹ׃    ³⁹ וְאֵ֙לֶּה֙ מוֹשְׁבוֹתָ֔ם לְטִירוֹתָ֖ם בִּגְבוּלָ֑ם לִבְנֵ֤י אַהֲרֹן֙ לְמִשְׁפַּחַ֣ת הַקְּהָתִ֔י כִּ֥י לָהֶ֖ם הָיָ֥ה הַגּוֹרָֽל׃ ⁴⁰ וַֽיִּתְּנ֥וּ לָהֶ֛ם אֶת חֶבְר֖וֹן בְּאֶ֣רֶץ יְהוּדָ֑ה וְאֶת מִגְרָשֶׁ֖יהָ סְבִיבֹתֶֽיהָ׃ ⁴¹ וְאֶת שְׂדֵ֥ה הָעִ֖יר וְאֶת חֲצֵרֶ֑יהָ נָתְנ֖וּ לְכָלֵ֥ב בֶּן יְפֻנֶּֽה׃    ⁴² וְלִבְנֵ֣י אַהֲרֹ֗ן נָתְנוּ֙ אֶת עָרֵ֣י הַמִּקְלָ֔ט אֶת חֶבְר֥וֹן וְאֶת לִבְנָ֖ה וְאֶת מִגְרָשֶׁ֑יהָ וְאֶת יַתִּ֥ר וְאֶֽת אֶשְׁתְּמֹ֖עַ וְאֶת מִגְרָשֶֽׁיהָ׃ ⁴³ וְאֶת חִילֵז֙ וְאֶת מִגְרָשֶׁ֔יהָ אֶת דְּבִ֖יר וְאֶת מִגְרָשֶֽׁיהָ׃ ⁴⁴ וְאֶת עָשָׁן֙ וְאֶת מִגְרָשֶׁ֔יהָ וְאֶת בֵּ֥ית שֶׁ֖מֶשׁ וְאֶת מִגְרָשֶֽׁיהָ׃    ⁴⁵ וּמִמַּטֵּ֣ה בִנְיָמִ֗ן אֶת גֶּ֤בַע וְאֶת מִגְרָשֶׁ֙יהָ֙ וְאֶת עָלֶ֣מֶת וְאֶת מִגְרָשֶׁ֔יהָ וְאֶת עֲנָת֖וֹת וְאֶת מִגְרָשֶׁ֑יהָ כָּל עָרֵיהֶ֛ם שְׁלֹשׁ עֶשְׂרֵ֥ה עִ֖יר בְּמִשְׁפְּחוֹתֵיהֶֽם׃    ⁴⁶ וְלִבְנֵ֨י קְהָ֜ת הַנּוֹתָרִ֗ים מִמִּשְׁפַּ֣חַת הַמַּטֶּ֡ה מִֽ֠מַּחֲצִית מַטֵּ֨ה חֲצִ֧י מְנַשֶּׁ֛ה בַּגּוֹרָ֖ל עָרִ֥ים עָֽשֶׂר׃    ⁴⁷ וְלִבְנֵ֨י גֵרְשׁ֜וֹם לְמִשְׁפְּחוֹתָ֗ם מִמַּטֵּ֣ה יִ֠שָׂשכָר וּמִמַּטֵּ֨ה אָשֵׁ֜ר וּמִמַּטֵּ֣ה נַפְתָּלִ֗י וּמִמַּטֵּ֤ה מְנַשֶּׁה֙ בַּבָּשָׁ֔ן עָרִ֖ים שְׁלֹ֥שׁ עֶשְׂרֵֽה׃    ⁴⁸ לִבְנֵ֨י מְרָרִ֜י לְמִשְׁפְּחוֹתָ֗ם מִמַּטֵּ֣ה רְ֠אוּבֵן וּֽמִמַּטֵּה גָ֞ד וּמִמַּטֵּ֤ה זְבוּלֻן֙ בַּגּוֹרָ֔ל עָרִ֖ים שְׁתֵּ֥ים עֶשְׂרֵֽה׃ ⁴⁹ וַיִּתְּנ֥וּ בְנֵי יִשְׂרָאֵ֖ל לַלְוִיִּ֑ם אֶת הֶעָרִ֖ים וְאֶת מִגְרְשֵׁיהֶֽם׃ ⁵⁰ וַיִּתְּנ֣וּ בַגּוֹרָ֗ל מִמַּטֵּ֤ה בְנֵי יְהוּדָה֙ וּמִמַּטֵּ֣ה בְנֵי שִׁמְע֔וֹן וּמִמַּטֵּ֖ה בְּנֵ֣י בִנְיָמִ֑ן אֵ֚ת הֶעָרִ֣ים הָאֵ֔לֶּה אֲשֶׁר יִקְרְא֥וּ אֶתְהֶ֖ם בְּשֵׁמֽוֹת׃    ⁵¹ וּמִֽמִּשְׁפְּח֖וֹת בְּנֵ֣י קְהָ֑ת וַיְהִי֙ עָרֵ֣י גְבוּלָ֔ם מִמַּטֵּ֖ה אֶפְרָֽיִם׃ ⁵² וַיִּתְּנ֨וּ לָהֶ֜ם אֶת עָרֵ֧י הַמִּקְלָ֛ט אֶת שְׁכֶ֥ם וְאֶת מִגְרָשֶׁ֖יהָ בְּהַ֣ר אֶפְרָ֑יִם וְאֶת גֶּ֖זֶר וְאֶת מִגְרָשֶֽׁיהָ׃ ⁵³ וְאֶֽת יָקְמְעָם֙ וְאֶת מִגְרָשֶׁ֔יהָ וְאֶת בֵּ֥ית חוֹר֖וֹן וְאֶת מִגְרָשֶֽׁיהָ׃ ⁵⁴ וְאֶת אַיָּלוֹן֙ וְאֶת מִגְרָשֶׁ֔יהָ וְאֶת גַּת רִמּ֖וֹן וְאֶת מִגְרָשֶֽׁיהָ׃

⁵⁵ וּמִֽמַּחֲצִית֙ מַטֵּ֣ה מְנַשֶּׁ֔ה אֶת עָנֵר֙ וְאֶת מִגְרָשֶׁ֔יהָ וְאֶת בִּלְעָ֖ם וְאֶת מִגְרָשֶׁ֑יהָ לְמִשְׁפַּ֥חַת לִבְנֵי קְהָ֖ת הַנּוֹתָרִֽים׃

⁵⁶ לִבְנֵי֮ גֵּרְשׁוֹם֒ מִמִּשְׁפַּ֗חַת חֲצִי֙ מַטֵּ֣ה מְנַשֶּׁ֔ה אֶת גּוֹלָ֥ן בַּבָּשָׁ֖ן וְאֶת מִגְרָשֶׁ֑יהָ וְאֶת עַשְׁתָּר֖וֹת וְאֶת מִגְרָשֶֽׁיהָ׃    ⁵⁷ וּמִמַּטֵּ֣ה יִשָׂשכָ֔ר אֶת קֶ֖דֶשׁ וְאֶת מִגְרָשֶׁ֑יהָ אֶת דָּבְרַ֖ת וְאֶת מִגְרָשֶֽׁיהָ׃ ⁵⁸ וְאֶת רָאמוֹת֙ וְאֶת מִגְרָשֶׁ֔יהָ וְאֶת עָנֵ֖ם וְאֶת מִגְרָשֶֽׁיהָ׃    ⁵⁹ וּמִמַּטֵּ֣ה אָשֵׁ֔ר אֶת מָשָׁ֖ל וְאֶת מִגְרָשֶׁ֑יהָ וְאֶת עַבְדּ֖וֹן וְאֶת מִגְרָשֶֽׁיהָ׃ ⁶⁰ וְאֶת חוּקֹק֙ וְאֶת מִגְרָשֶׁ֔יהָ וְאֶת רְחֹ֖ב וְאֶת מִגְרָשֶֽׁיהָ׃ ⁶¹ וּמִמַּטֵּ֣ה נַפְתָּלִ֗י אֶת קֶ֤דֶשׁ בַּגָּלִיל֙ וְאֶת מִגְרָשֶׁ֔יהָ וְאֶת חַמּ֖וֹן וְאֶת מִגְרָשֶׁ֑יהָ וְאֶת קִרְיָתַ֖יִם וְאֶת מִגְרָשֶֽׁיהָ׃    ⁶² לִבְנֵ֣י מְרָרִי֮ הַנּוֹתָרִים֒ מִמַּטֵּ֣ה זְבוּלֻ֔ן אֶת רִמּוֹנ֖וֹ וְאֶת מִגְרָשֶׁ֑יהָ אֶת תָּב֖וֹר וְאֶת מִגְרָשֶֽׁיהָ׃ ⁶³ וּמֵעֵ֜בֶר לְיַרְדֵּ֣ן יְרֵחוֹ֮ לְמִזְרַ֣ח הַיַּרְדֵּן֒ מִמַּטֵּ֣ה רְאוּבֵ֔ן אֶת בֶּ֥צֶר בַּמִּדְבָּ֖ר וְאֶת מִגְרָשֶׁ֑יהָ וְאֶת יַ֖הְצָה וְאֶת מִגְרָשֶֽׁיהָ׃ ⁶⁴ וְאֶת קְדֵמוֹת֙ וְאֶת מִגְרָשֶׁ֔יהָ וְאֶת מֵיפַ֖עַת וְאֶת מִגְרָשֶֽׁיהָ׃ ⁶⁵ וּמִ֨מַּטֵּה גָ֔ד אֶת רָאמ֥וֹת בַּגִּלְעָ֖ד וְאֶת מִגְרָשֶׁ֑יהָ וְאֶֽת מַחֲנַ֖יִם וְאֶת מִגְרָשֶֽׁיהָ׃ ⁶⁶ וְאֶת חֶשְׁבּוֹן֙ וְאֶת מִגְרָשֶׁ֔יהָ וְאֶת יַעְזֵ֖יר וְאֶת מִגְרָשֶֽׁיהָ׃